Malamang sa malamang, eh nakasakay ka na ng jeep.

May iba’t ibang  uri ng jeep. May makukulay, may mukhang kalawang, may kabayong figurine, torotot, family picture. Parang yung driver nito, iba-iba rin.

Unahin natin ang mga “GQ” o Good Qualities ng mga drivers.
P.S. Kaunti lang ang ganitong  jeepney drivers.

1. immediate ang pagsusukli, at TAMA  ang sukli. O kung wala pang barya ay sasabihan ka ng:
- “Teka lang po yung sukli ha.“
- “Wait lang po” (sosyal yung driver.)

2. magalang, napupuno ng po at opo ang dialogue nya sa mga middle age at sa oldies.
- “Saan po bababa?”
- “Ito pong beinte saan po galing”,
- “Ilan po ito, Saan po?”

Narito naman ang mga di gaanong GQ.. pwede ring BQ’s o Bad Qualities.

1. Barumbado magmaneho. Yung tipong nangangarera sa kapwa jeep driver. Yung jeep ay parang lumilipad na dahil sa bilis at mararamdaman na parang nasa roller coaster ka. Minsan naranasan ko to gusto ko pang magbigay ng “ride fee” kasi nag-enjoy ako. Pero yung isang ale sabi sa driver- “Manong di na nakakatuwa ah”

2. Swapang sa pasahero. Wala ng masyadong description, basta “SWAPANG” Sila yung kahit mga laseng na tambay o natutulog sa kalye ay yayayaing sumakay.
-”Sakay na kayo, Cubao!!” (Papara naman kasi ang mga sasakay, ba’t kelangan pang pilitin at hihinto pa ang jeep sa tapat nito, hussle sa mga nakasakay.)
-”Pasok, pasok sa kaliwa apat pa.” (Kahit meron ng mga nakaupo na 1/4 lang ang pwet na nakasayad)
-”Sukli o,  pakisuyo” (Kulang ng piso o higit pa ang sukli. Ibibigay lang ng tama ang sukli kapag umangal ang pasahero.)
-”Bawal pong bumaba dito itatabi ko lang.” (Pero kapag magsasakay ng pasahero kahit sa gitna ng kalsada hihinto yan.)
Pinaka-ayaw ko sa mga swapang na driver ay yung sa kanto ng intersection hihinto ng 5-10 minutes para magtawag ng pasahero. Heavy Traffic to sobra

3. Eto ang malupet. Matinik sa pamasahe at nang-gugulang pa. Kababayad lang ng pasahero at hihirit ang driver.
- “Estudyante tong beinte? Nasaan ID nyo?” (Kahit naka uniform ang bata.)
- ” Kulang po ito ng dalawampiso.” (Ipapaliwanag ng lolang mabagal magsalita na senior sya.)

4. Lipat bahay version sa Jeep.
- “Lipat na lang po kayo sa kabilang jeep” (Ibibigay ang minimum pamasahe sa pasahero para lumipat sa kabilang jeep).
Ewan ko kung ano rason nila. Maaaring na e-LBM, may binyag, kumpil, pero hussle sa pasahero at di makatarungan.

5. Medyo Bastos na Driver
- “P*ta naman o… Trapik ang P*tang In*” (Mga driver na namumutawi ng bad words ang lenggwahe.)
- “Kapit lang po sa matigas, aandar na.” (Eto green joke lang ang tingin ko dito. Yung kaklasa kong babae tawa ng tawa dito. Bakit kaya?”)

Merong mga drivers ang may kombinasyon ng mga nabanggit na GQ’s at BQ’s. Ba’t jeepney drivers lang? Kasi sa jeep ako madalas sumakay. Pero applicable din naman yang mga yan sa tricyle, bus, taxi, barko, eroplano at kalesa.

Pasintabi po sa mga Pampasaherong Drivers.  Ang mga nakatala sa itaas ay pawang mga naranasan ko na at malamang ay naranasan na rin ng iba. Peace Yo!